عين المسافر  

العودة   عين المسافر > عين المسافر العربية > العين على مصر


اخواتنا العزيزات من الدول الشقيقة قبل السفر لمصر ...معلومات تهمكم

العين على مصر


إضافة رد
 
أدوات الموضوع انواع عرض الموضوع
  #1  
قديم 22-05-2007, 02:26 PM
الصورة الرمزية سفير الغيوم
سفير الغيوم سفير الغيوم غير متواجد حالياً
مشرف سابق
 





سفير الغيوم will become famous soon enough

افتراضي اخواتنا العزيزات من الدول الشقيقة قبل السفر لمصر ...معلومات تهمكم


استخرجنا لكم بعض المعلومات التى دائما ما تسئلون عليها قبل السفر لمصر وان شاءالله تفيدكم او حتى سجلوها عندكم لحين سفركم فى الاجازة ان شاءالله

ترفيه وتسوق( مولات )

مروة:
اركاديا مول على كورنيش النيل قريب من مبنى الاذاعة والتليفزيون مول جميل على فكرة وفى ملاهى فى اخر دور وفى صيدلية العزبى صيدلية شاملة وكبيرة وفيها وفى فى الدور الخامس توكيل ل bourjois

وفى الدور الارضى فى كافية ترنينون كافية حلو وفرعة الاصلى فى المهندسين بشارع جامعة الدول العربية make-up

جراند مول المعادى
world trade center او مركز التجارة العالمى ودة قبل اركاديا بشوية

الملحق التجارى بهيلتون رمسيس مول متنوع برضة وفى مسرح وسينما
جنينة مول فى عباس العقاد شارع متفرع منة اسمة البطراواى بمدينة نصر مول لذيذ وحاجتة راقية وجميلة

العقاد مول دة فى طريق النصر بمدينة نصر قبل ما تتدخلى عباس العقاد

سراج مول دة مول كبير لانوة 3 مول ببعض مفتوحيين على بعض من جوة وفى الدور التالت فى مركز تجميل مسيو عبدو معروف ومشهور والمول دة فى مكرم عبيد بمدينة نصر

سيتى سنتر مول جنب سراج مول وهو صغير شوية بس لسة جديد

بلاتنيوم مول بالمهندسين بشارع سوريا ودة متخصص بنسبة 80% للمحجبات واشاربات وازياء المحجبات

فور سيزون مول دة فى الجيزة قدام جنينة الحيوانات ودة فى مركز تجميل محمد الصغير ودة من اغلى المولات على فكرة
مروة:
افتتح الشهر ال فات مول بيسموة مول المحجبات لان 90% منة للمحجبات من محلات لبس ومحلات طرح كتير باشكال تحفة ومحلات لىكسسورات الحجاب واسعار الملابس فى واللة معقولة وفى حاجات ارخص من وسط البلد او مدينة نصر

المول فى المهندسين شارع سوريا متفرع من شارع جامعة الدول العربية يعنى وانتى فى جامعة الدول ادخلى شارع سورا وافضلى ماشية لحد ما حتلاقى مفارق والمول لونة اخضر واخد ناصية كبيرة كدة واسمة بلاتنيوم مول ادخلى شارع سوريا من اولة وافضلى ماشية لحد ما تلاقى تقاطع طرق واشارة هو بقى فى الوش علطول حتلاقية بسهولة لانوة كبير وشكلة مميز

كان فى محل طرح عارض بعض الطرح بالشنطة بتاعتها نفس شكل الطرحة وكان ب 93 جنية لانها مستوردة من برضة المحل تقريبا كان فى تانى دور وعرضها بالفترينة

مطاعم:
المطاعم فى اندريا الى فى الميرلاند فى مصر الجديدة والمقطم وفى المعادى والهرم ومتخصص بالفراخ المشوية عندة تحفة

مطاعم تكا فى المهندسين

مطاعم ماكدونليز وكنتاكى وبيتزا هت وكوك دور ومؤمن ووصايا
الميرلاند فى مصر الجديدة وهى زى جنينة كبيرة فيها مطاعم وكافيهات وديسكوتك وفيها كمان عروض الدولفين جميلة جدا وجنبها فى جراند كافية وفى مطعم fraiday
مطاعم ابو شقرة للكباب

مطاعم قدورة للاسماك فى مدينة نصر

فرحات اشهر واحد هناك بتاع حمام له فروع فى السيده زينب والمهندسين ميدان لبنان ومصر الجديده بالمحكمة

مطعم العهد الجديد بالحسين دة مطعم كل اكلاتة مصرية اشهرها الكوارع والفته والحمام والممبار ...

المالكى ام على ورز بلبن ... فى الحسين والمهندسين ومصر الجديده
واشهر واحد بيعمل احلى كشرى مصرى طبعا لازم تتذوقية موجود هناك اسمة ابو طارق

كشرى التحرير بشارع طلعت حرب من ناحية 26 يوليو عند سينما ميامى
العبد للحلويات فى شارع 26 يوليو وفرع تانى فى طلعت حرب

طلعت حرب برضة قويدار وقصر الاليزية

محل لابوار عند ابراج اغاخان على الكورنيش

ماريوت باكرى فى المهندسين

قهوة الفيشاوي في خان الخليلي الشاي الاخضر انما اية لذيييذ
في بواخر كتيييييره أوي دلوقتي،
،أنا أعرف نايل سيتي الزمالك،في كذا مطعم،أنصحك بالمأكولات الشرقيه أو الأسماك،،المينمم بيكون غالي و حسب كمان كل مطعم،
، في كمان هابي دولفين في المنيل،،ده غالي شويه بس مش عارفه إيه نظامه دلوقتي،،ممكن تكلميهم و تسألي،
،في طبعا فرعون النيل و دي بتمشي،،بردو إتصلي و إسألي على الأسعار و الحجز

ترفيه:مروة:

ماجك لاند فى 6 اكتوبر وفيها مدينة الانتاج الاعلامى

دريم لاند فى 6 اكتوبر

جيرو لاند فى مدينة العبور

السندباد فى طريق المطار

الاهرامات وابو الهول ومركب الشمس

القلعة ومصر القديمة

المتحف المصرى والاسلامى

برج القاهرة وبتشوفي منة القاهرة كلها من فوق وادور الربع عشر فية المطعم الدائرى المتحرك تاكلى وبيلف بيكى

القرية الفرعونية
رحلات نيلية بباخرة متحركة او ثابتة عندك بواخر حلوة كتير زى nile city;le pache.el sarayia

الحسين وخان الخليلى الى ممكن تشترى منة جلاليب مصرى وانتيكات مصرية واقطان وفضيات بس طبعا الاسعار هناك سياحية

الصاغة فى شارع الازهر يعنى سوق ذهب كبير

شارع الازهر اماكن بتيع حاجات بسعر ارخص طبعا من المولات واسعارها متوسطة وحلوة

سوق الثلاثاء دة شارع متخصص لحاجة المطبخ بس تلاقية فية كل حاجة خاصة بالمطبخ

سينما مترو ميامى وغيرهم كتير بشارع طلعت حرب

حديقة الحيوان بالجيزة

-snow city جنب ارض المعارض فى صلاح سالم وفيها قاعة تزحلق على الجليد وقاعة تانية متحف ثلجى لاشهر الاماكن بمصر بس خدى بالك درجة الحرارة 15 تحت الصفر بلبسوكى طبعا حاجات تقيلة جدا بس حلوة
بطريق مصر اسكندرية الصحراوى الغابة المفتوحة وهى بتركب عربية وبتمر وسط الحيوانات جميلة اوى
mmm
درب البرابره
و بيبيعوا فيه حجات السبوع و الأفراح الكروت و الملبس و الشيكولاته و الحلويات

البحر الاحمر شرم والغردقه وافضل العين السخنه لانها قريبه وفيها قري سياحيه تجنن منهم قريه والله غايه في الجمال اسمها بالميرا تحفه بجد 5 نجوم وكمان ستيلا دي ماري بس اغلي شويه لكن تستحق

ستائر وملايات:

مصراوية:
في محل شيك اوي واسعاره مش غالية خالص في الزماالك في شارع 26 يوليو امام البنزينة اللي جنب عبده صالح في فوط تهوس وملاياته كلها شيك والله شفت ملاية رقيقية وشيك ب 90 جنيه فيه
لاقتها في الازهر ب 75 بس التشطيب في المحل انضف بكتير
الحاجات دي بتكون حلوة اوي في معرض القاهرة وبتكون سعرها مش غالي
الملايات بتعجبني شكلها وكتيرة وكمان مفارش السريروالسفرة
المفارش الاورجنزا اللي طالعة موضة اللي هي بتاعة السفرة والانتريهات المطرزة شفت منها ستاير في الازهر اللون النبيتي المطرز دهبي يهوس والبيج في دهبي
المتر ب كام ب 42 ده قبل الفصال طبعا

محل فوط
المحل اللي في الزمالك ده في فوط شيك اوي اوي واسعارها مش غالية وملاياته جميلة اوي وسيمبل عارفا اكيد الماريوت بصي امامه كوبري اللي هو بتاع المحور اللي هو كوبري 26 يوليو بتاع الزمالك هتلاقي اتجاهين واحد جاي من الاسعاف او التحرير نازل ع الزمالك واتجاه من الزمالك طالع من تحت طالع علي الاسعاف ووسط البلد وكده الاتجاه اللي امام الماريوت مباشرة اللي طالع من الزمالك تخلي الماريوت علي شمالك وتفضلي ماشية هتلاقي المحل بعد 10 دقايق مشي او اقل علي ايدك الشمال برضوا هتلاقي في طريقك وانتي رايحا له ومحل بيع سيارات وحلواني سيموندس وبعدين محل ورد بس هتمشي بسيط هتلاقيه علي نفس الصف وهو ملحوظ اوي لا تقلقي عارفا مسرح االزمالك هو في امامه بنزينة هو في وش البنزينة وما دمتي رحتي الشارع ده بقا لازم تشوفي محل الاطباق والفخاريات والحاجات بتاعة المطبخ دي في نفس الشارع امام حلواني سيموندس ع الرصيف التاني

رياضة
ام-دانة_الدندونة_الامورة

الايروبيكس في مكان ممتاز بالمهندسين فيه قسم للنساء فقط وسعره كويس 175 ثلاث مرات بالاسبوع مكانه عند ميدان لبنان عند طلعة الكوبري ل6 اكتوبر
هيلتون النيل دروس رقص تانجو وسالسا الحصة ب 20 جنيه وممكن حتى تروحى تتفرجى الاول ولو عجبك الموضوع تشتركى وتدفعى حصة بحصة بس ايام ايه مش عارفة هى تقريبا من الساعة 6 ل 8 تدريب وبعدين بيقلبوها رقص بجد للناس المتمرنه بعد كده ل 10 ده اللى اعرفه لو عايزه ممكن تروحى تسألى او حتى بالتليفون
مدرسة سامية علوبه بالمهندسين هاتى رقمها من الدليل بتعمل دورات رقص لرقصات مختلفة وكتير بحوالى 300 جنيه فى الشهر وعندها بنات بتدرب
الايروبكس
ده عبارة عن رياضه على انغام الموسيقى لكن الرقص اللى بقولك عليه فى الهيلتون ده رقص تانجو وسالسا حاجه كده برازيلى ورقص الافرانكا فى كمان سامية علوبه فى المعادى هاتى رقمها من الدليل بتعمل دورات رقص لرقصات مختلفة وكتير بحوالى 300 جنيه فى الشهر وعندها بنات بتدرب
ام-دانة_الدندونة_الامورة
الايروبيكس في مكان ممتاز بالمهندسين فيه قسم للنساء فقط وسعره كويس 175 ثلاث مرات بالاسبوع مكانه عند ميدان لبنان عند طلعة الكوبري ل6 اكتوبر
[/frame]

كوافيرات:
مروة:
محمد الصغير فى الفور سيزون مول
مسيو عبدة فى السراج مول
صلاح سليم +مديحة سليم+ نانيس سليم اشهر ماكيرات هنا دلوقتى وهو كوافير كلة على بعض مركز تجميل حلو فى مصر الجديدة قدام كلية البنات
ياقوت فى شارع البطراوى ال فى جنية مول فى مدينة نصر بصراحة ممتاز
رواء الاسلام:
كوافير عبير في شارع السنترال المتفرع من شارع فيصل او الهرم و بصراحة كان ممتاز و الناس كلها عجبها مكياجي
Mmm:
كوفير عبير تقريبا سعره للعروسه 250 مش متأكدة قوي
كوافير تاني في نفس الشارع اسمه ليالي فيه واحده اسمها فايزة أنا شفتها و هي بتعمل تيست مكياج لعروسة و كانت عجباني
زيزي في المعادي بس في المحل بتاع جوزها لان محلها صغير , و برضه كان مكياجي هادي و جميل بس التسريحة حسيت انها كانت بسيطة جدا ماتستاهلش ال400 جنية اللي خادتهم
كوافير حمادة -المعادي شارع 6 مش فاكرة رقم 34 او 32 مش بيتوه سهل اوي توصلي ليه من الكورنيش وتدخلي من الفتحة الثانية للمعادي وانا فاكرة جارتي كانت عملت عنده من 4 سنين كان بحاولي 500
بيوتفل هير فى شارع الحجاز مصر الجديدة بعد مدرسة الطبرى و مدرسة سانت فاتيما على نفس الصف الكوافير ده حلو وكمان اسعارة حلوة
كهرمانه:
انا اللي اعرفه مسيو عبدو....عمل لصحبتي في فرحها كانت ماشاءالله قمر قمر قمر..خلاها مش هي
بس هو غالي شوية بتدفعي 1200 وبيبقي كورس كامل بتروحي من قبلها بشهر ولا شهرين كل اسبوع يعملك ماسكات وحمامات مريم لشعرك...وصبغة ومانيكير وباديكير
ام-دانة_الدندونة_الامورة
كوافير محمد الصغير اللي بالزمالك رووعة
spa خطير
سكرة هانم
بالنسبة لمسيو عبدة ..هو عنده المدام بتعمل شعر وميك اب تنظيف البشرة و العناية بالجسم
Hadhoda
الكوافيرة كانت فى أرض الجولف بس قالت لى انها غالية شوية يعنى الهاى لايت كان ب 150 وقالت لى ان
اسعارهم غالية
nany_2020
على فكرة مسيو عبده بياخد 1700 لو فى مكانك يعنى القاعه أو الفندق
Nora amaar
كوافير اسمه M&S مجدي و سيد ليه فروع كتييرة بس عيبه انه بيبقي زحمة قوي لو عاوزيين نمرته ابعته.
Style كوافير هاىلايت للشعر
فى ارض الجولف صحبتى عملت فيه تحفة عليها (اكلمت عليها قبل كدة) وعملت ب150 جنيه

فنادق

الفنادق التاليه ساكتب اسمائها فقط وهي تسير على نفس النظام مع فارق المستوى وبالطبع الاسماء المشهوره معروف مستوايتها:
فندق الكونراد
سميراميس انتركونتينتال
فندق النيل هيلتون
فندق رمسيس هيلتون
فندق جراند حياة
فندق ماريوت
فندق هلنان شبرد
فندق سفير (الزمالك)
فندق شيراتون القاهره
فندق شيراتون الجزيره
فندق شيراتون هليوبليس
فندق ميريديان المطار
فندق سونيستا
فندق سوفيتيل المعادي
فندق موفينبيك الهرم
فندق البارون(مصر الجديده)
فندق قاعود(فيصل-الهرم)
فندق صحارى ان
فندق مينا هاوس
فندق ميدل ايست (الهرم)
فندق اطلس الزمالك
فندق سياج بيراميدز
فندق النبيله الزمالك
فندق الحريه (مصر الجديده)
فندق امان (الدقي)
فندق برج ام كلثوم (الزمالك)
ودي الاسماء اللي اسعفتني زاكرتي اني افتكرها طبعا يوجد فنادق اخرى ارجو من اللي يفتكرها انه يضمها للقايمه دي مشكور[/frame]

ملابس

سمسمة:
محل فى حسان ابن ثابت غير بليجر انا كنت عنده امبارح فى الشارع اللى قدام حبايب اللى فيه كوافير تويست المحل على ايدك اليمين فيه شوية لانجيريهات خرافه انا رايحه تانى النهارده فيه اطقم جنان فيه بقى اطقم عباره عن قميص قصير بالروب بتاعه شفاف وعليه تطريز جنان تحفه فى منتهى الرقه و ب 95 جنيه بس منه الابيض والاحمر القاتم واروز والوان تانيه كمان الطقم ده حقيقى يجنن يا ريت تشوفيه وعندهم حتة طقم برضه طويل روز خرافه رقه وشياكه تحفه القميص طويل بس مش اوى يعنى بعد الركبه بشبرين تقريبا ومفتوح من قدام وكله شفاف لكن فيه شبر فوق ساتان ومتطعم بفرو برضه نفس الروز الباودر والروب برضه شفاف ومتطعم بالفرو بشياكه تهوس وبيتقفل بزرار مدور صغنون وده ب 250 وفيه جنبه واحد روز برضه تحفه بالروب ب 400 بعد الخصم وشوية اشكال للبانتيهات تجنن والقطن كمان فى منتهى بقى
لو قريبه من مصر الجديده فى محل اسمه رسمية فى شارع الاهرام بروكسى ( الشارع اللى فيه حرية مول وسنما نورماندى بيبيع حاجات نظيفة قوى ومستورده
فى ماركة تقليد التريامف اسمها لميس ب 30 جنيه وسعر تريامف دلوقتى وصل ل 120 جنيه

والمحل اللى فى روكسى اللى بتقول عليه بنت ابيها اسمه رسمية فى شارع الاهرام وانا كنت قلته لكهرمانه اول ما سالت عن براهات تريامف وفى محلات تانية زى اللى فى اول بطرس غالى مش فاكرة اسمه بس هو اول محل فى الشارع على الشمال بيبيع التقليد بتاعه ب 30 جنيه ةحلو قوى برضه
كهرمانه:
انا كنت جايبة حمالات سورية بتكون عريضة اوي وحقيقي كان رائع جدا وكان سعره جنيه50 من محل اسمه كاستيلا هنا في مدينة نصر
واكتر حاجة نفعت معايا وفرق كتيييير في شكل الملابس وبنصح بيه اي واحدة المنطقة دي عندها كبيرة نسبيا لانه بيلم جامد
نشوف كدة الوكالة بيبقي فيها حاجات حلوة برضه
ام دندونه:
المحل المتخصص فى بيع برا تريمف الاصلى اسمه باليت فى ميدان المنشيه فى بورسعيد و اخر اسمه الماروز فى المجمع التجارى بجوار فندق سونستا الاسعار من 100 فما فوق
ROSHANA
حاجات البيت القطن عندك فابلوس (ليه فروع كتيرة) بس انصحك تشترى منه وقت الاوكازيون مش اول الموسم لان اسعاره اول الموسم بتبقى غاليه شوية الموسم

محل اسمه=== take 5 ===Escape عنده لبس حريمى واطفال قطن كاجوال جميل جدا
محل اسمه Angel Dustعنده سويت شيرت رجالى حلوة ولبس اطفال كمان
روجادا ف الحرية مول ورمسيس هيلتون .

رد مع اقتباس
إضافة رد

مواقع النشر (المفضلة)

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
الانتقال السريع

أقم صلاتك
جديد عين المسافر

الساعة الآن 07:20 AM.


Powered by vBulletin® Version 3.7.3
.Copyright ©2000 - 2014, Jelsoft Enterprises Ltd
Protected by CBACK.de CrackerTracker
1 2 3 4 5 6 7 9 10 11 12 13 14 16 17 18 19 20 21 24 25 26 27 28 29 30 37